صدر آصف علی زرداری نے آج (جمعرات) اسلام آباد میں چینی سفارت خانے کا دورہ کیا اور کراچی میں دہشت گردی کے حملے میں چینی شہریوں کی المناک ہلاکت پر دلی تعزیت پیش کی۔
حملے کی شدید مذمت کرتے ہوئے صدر نے اس گھناؤنے جرم کے مرتکب افراد کو انصاف کے کٹہرے میں لانے کے عزم کا اعادہ کیا۔ انہوں نے دکھ کی اس گھڑی میں چینی عوام کے ساتھ پاکستان کی یکجہتی کا اظہار کیا۔
چینی سفیر جیانگ زیڈونگ سے بات چیت میں صدر زرداری نے پاکستان کی سماجی و اقتصادی ترقی میں چینی حکومت اور عوام کے تعاون کا اعتراف کیا۔
انہوں نے کہا کہ دشمن عناصر کی ایسی بزدلانہ کارروائیاں دونوں دیرینہ اتحادیوں کے درمیان دوستی کے بندھن کو توڑ نہیں سکتیں۔
صدر نے ملک میں مقیم چینی شہریوں کے تحفظ اور سلامتی کو یقینی بنانے کے لیے پاکستان کے عزم کا اعادہ بھی کیا۔
