– اشتہار –
اسلام آباد، 25 اکتوبر (اے پی پی): کل جماعتی حریت کانفرنس (اے پی ایچ سی) نے جمعہ کو یہاں یوم سیاہ کے حوالے سے تیاریوں اور احتجاجی پروگراموں کا جائزہ لینے کے لیے ایک اجلاس منعقد کیا جس کا مقصد معصوم کشمیریوں پر مظالم اور بربریت کو روکنے کے لیے بھارت پر دباؤ ڈالنا ہے۔
اجلاس کی صدارت عوامی تحریک کے سیکرٹری اطلاعات مشتاق احمد بٹ نے کی۔ اجلاس کے دوران فیصلہ کیا گیا کہ پاکستان اور آزاد کشمیر کی تمام سیاسی، مذہبی اور سماجی جماعتوں بشمول لبریشن سیل، پاکستان سویٹ ہوم اور دیگر مکاتب فکر کے طلباء کو احتجاج میں شرکت کی دعوت دی جائے۔
یاد رہے 27 اکتوبر 1947 کشمیر کی تاریخ کے سیاہ ترین دنوں میں سے ایک ہے جب بھارتی سامراج نے تمام عالمی قوانین کی کھلی خلاف ورزی کرتے ہوئے اپنی فوج سری نگر میں اتاری۔
ریاست کے عوام نے اس بھارتی ناجائز قبضے کو کبھی تسلیم نہیں کیا اور اس کے خلاف تحریک شروع کی جو آج تک جاری ہے۔ اس سامراجی قبضے کے خلاف 27 اکتوبر بروز اتوار کو یہاں ایک زبردست احتجاجی مظاہرہ کیا جائے گا۔
اجلاس میں سابق کنوینر محمود احمد ساگر، شیخ عبدالمتین، میاں مظفر، امتیاز وانی، عدیل مشتاق، محمد اشرف ڈار نے شرکت کی۔
– اشتہار –
