– اشتہار –
27 نومبر (اے پی پی) بیلاروس کے صدر الیگزینڈر لوکاشینکو پاکستان کا تین روزہ سرکاری دورہ مکمل کرنے کے بعد بدھ کو روانہ ہو گئے۔
وزیر اعظم کے دفتر کی ایک خبر میں بتایا گیا کہ وزیر اعظم محمد شہباز شریف نے بیلاروسی صدر کو ائیرپورٹ پر الوداع کیا۔
دورے کے دوران، دونوں رہنماؤں نے دو طرفہ تعلقات کی مکمل رینج کا جامع جائزہ لیا اور سیاسی، تجارتی، اقتصادی، ثقافتی، سماجی اور دیگر شعبوں میں دونوں ممالک کے درمیان دوستانہ تعلقات کو مزید گہرا کرنے کے لیے اپنے باہمی عزم کا اعادہ کیا۔
دونوں فریقوں نے پندرہ اہم معاہدوں اور مفاہمت ناموں پر دستخط کیے جن میں 2025-2027 کی مدت کے لیے جامع تعاون کا روڈ میپ بھی شامل ہے۔ روڈ میپ پاکستان اور بیلاروس کے درمیان دوطرفہ اقتصادی تعاون کو بڑھانے پر مرکوز ہے۔
بیلاروس کے ممتاز تاجروں اور سرمایہ کاروں کے ایک وفد نے بھی صدر لوکاشینکو کے ہمراہ پاکستان کا دورہ کیا جنہوں نے پاکستانی ہم منصبوں سے وسیع ملاقاتیں کیں۔
وزیراعظم نے بیلاروسی صدر کو اپنے تین روزہ دورے کا فوٹو البم بھی پیش کیا۔
اس موقع پر نائب وزیراعظم و وزیر خارجہ سینیٹر اسحاق ڈار اور وفاقی وزیر اطلاعات و نشریات عطاء اللہ تارڑ بھی موجود تھے۔
– اشتہار –
