وزیر اعظم شہباز شریف نے آج اسلام آباد میں چینی سفارت خانے کا دورہ کیا اور کراچی دہشت گرد حملے میں چینی شہریوں کے جاں بحق ہونے پر اظہار تعزیت کیا۔
پاکستان میں چین کے سفیر جیانگ زیڈونگ سے ملاقات کے دوران وزیراعظم نے چینی شہریوں کی ہلاکت پر گہرے دکھ اور افسوس کا اظہار کیا۔
وزیراعظم نے کہا کہ پاکستان میں چینی بھائیوں کے جان و مال کا تحفظ حکومت کی اولین ترجیح ہے۔
انہوں نے کہا کہ پاک چین تعلقات کو خراب کرنے کی گھناؤنی سازش کو ہرگز برداشت نہیں کیا جائے گا۔
وزیراعظم نے کہا کہ وہ خود واقعے کی تحقیقات کی نگرانی کریں گے۔ انہوں نے کہا کہ غیر ملکیوں کے لیے حفاظتی انتظامات مزید سخت کیے جائیں گے۔
شہباز شریف نے اس عزم کا اظہار کیا کہ واقعے کے ذمہ دار عناصر کی نشاندہی کرکے جلد از جلد کیفر کردار تک پہنچایا جائے گا۔
اس موقع پر چینی سفیر نے کراچی میں دہشت گردی کے واقعے کے بعد حکومت پاکستان کے فوری ردعمل اور اس کی تحقیقات شروع کرنے پر وزیراعظم کا شکریہ ادا کیا۔
انہوں نے معاملے کی موثر تحقیقات، دہشت گردوں کی فوری شناخت اور انہیں جلد از جلد انصاف کے کٹہرے میں لانے کے لیے حکومت پاکستان پر اپنے اعتماد کا اظہار کیا۔
