وزیر اعظم شہباز شریف نے کہا ہے کہ ملک میں غیر ملکی سرمایہ کاری کو فروغ دینا حکومت کی اولین ترجیح ہے۔
وہ آج (اتوار) لاہور میں زبیر عیسیٰ کی قیادت میں برطانیہ کی بااثر اور معروف کاروباری شخصیات کے وفد سے گفتگو کر رہے تھے۔
وزیراعظم نے کہا کہ خصوصی سرمایہ کاری سہولت کونسل کے ون ونڈو آپریشن کے ذریعے کاروباری اور تجارتی برادری کو بہترین سہولیات فراہم کی جا رہی ہیں۔ انہوں نے کہا کہ حکومت کی کوششوں کے نتیجے میں حالیہ دنوں میں ملکی معیشت بہتر ہو رہی ہے جس سے سرمایہ کاروں کا اعتماد بڑھ رہا ہے۔
وزیراعظم نے وفد کی پاکستان میں سرمایہ کاری کی حوصلہ افزائی کی۔
اس کے علاوہ پاکستان اور برطانیہ کے درمیان تعاون کی نئی راہیں تلاش کرنے اور بزنس ٹو بزنس تعلقات کو مزید بڑھانے پر بھی تبادلہ خیال کیا گیا۔
وفد نے وزیراعظم کی اقتصادی پالیسیوں کی تعریف کی اور قومی معیشت کے استحکام اور پائیدار ترقی پر اعتماد کا اظہار کیا۔
